السيّد رئيس الجمهورية محمّد الباجي قايد السّبسي:
يراودني تساؤل اليوم ونحن نحتفل بعيد المرأة التّونسية
لماذا… تفشل في كلّ مرّة أن تكون رئيسا لكلّ التّونسيين والتّونسيات؟
لماذا هذا الإصرار العجيب على الفشل؟
لماذا تعجز أن تكون رئيسا لشعب لتكون رئيسا لحزب؟
السيّد الرّئيس:
نعلم أنّ ديون le vote utile ثقيلة ونعلم أيضا أنّك تخلّص فيها بالأنتريس
يمنحك دستور الثّورة الحقّ في المبادرة التّشريعية، ومنذ 2014 تكرّمت على الشّعب التّونسي بمبادرتين تشريعيّتين، الأولى تهمّ متعاطي المخدّرات والثّانية تختصّ بالعفو على الفاسدين من رجال الأعمال ومن الإدارة والثّالثة والرّابعة في الثنيّة وتهمّ المساواة في الإرث وحرّية اِختيار القرين.
السيّد الرّئيس كيف تكمل تخلّص ديونك والأنتريس متاعهم قولنا باش نعلموك وقتها أنّ الشّعب التّونسي تعداده فوق العشرة مليون نسمة
ونعلموك أنّ خالتي هنيّة إلّي ساكنة في غربي ينفخ عليه الرّيح يطيروا ما يهمهاش في مباداراتك
هي تحتاج من رئيس الدّولة مبادرة تحفظلها كرامتها
ونعلموك زادة أنّ نساء سيدي محمّد إلّي رقصوا فرحا لرؤية الماء يحتاجوا مبادرة من رئيس الجمهورية تروي عطشهم للحياة الكريمة
ونعلموك زادة أنّ النّساء إلي يعبّيوهم في الكميونات باش يمشيوا يزرعوا ويحرثوا ويجمعوا يستناوا هوما زادة في مبادرة من الرّئيس تحفظ حقوقهم وحياتهم
ونعلموك زادة إلّي بناتنا إلي يسفّروا فيهم شبكات مختصّة للخليج بعقود عمل وهميّة وغادي يوليوا لحم رخيص ملوّح على قارعة الطّريق هوما زادة يحتاجوا لمبادرة من الرّئيس
ونحكيولك زادة على النّساء إلّي تخدم في المعامل والنّزل واش يقاسيوا
ونحكيولك على البنات إلّي يُقصُّوا على قرايتهم خاطر المدرسة بعيدة عليهم كيلومترات
السيّد الرّئيس:
عنا برشة حكايات على نساء تونس الكلّ ولهذا كيف تكمّل تخلّص ديون le vote utile عيشك قولنا باش نحضّروا رواحنا أحنا نحكيولك على نساء تونس وأنت اِعمل المبادرات واللّجان على مقاس كلّ واحد.