أخبار عاجلة
الرئيسية / غير مصنف / “بالفلاّڨي الفصيح”

“بالفلاّڨي الفصيح”

Spread the love

الخال عمّار الجماعي

إلّي يقولك “هو ضرب لحريّة التّعبير” وإلّي يقولك “إمّالة طبّق القانون على الزّيتونة” وإلّي يقولك “اللّهمّ اِضرب الظّالمين بالظّالمين” وإلّي يقول: “هو تدخّل قانوني، لكن ..” ( هاك الـ”لكن” الحلّوفة!!).. الحاصل هانا ولّينا كلّنا نردحوا بزوز محارم وكلّ واحد يضرب في طَرڨ وحده!

ماذا لو أنّ الأمر سرى على بقيّة “البوبالات الإعلامية”؟!.. زعمة حالنا الإعلامي يتڨعّد؟! زعمة “القناتين العاقلتين الوطنيّتين” يعبّوا الفراغ الإعلامي وما نقعدوش نبوّموا؟! هيا يا سيدي بن سيدي نفرّكوا رمّاناتهم الكلّ:

– الحوار التّونسي تلعب كيما تحبّ.. تفسّخك في سروالك وأنت تضحك! ما ثمّاش ليلة ما تهبطلكش مصيبة زرڨا.. تتكّالك من العشيّة مع “الرّباعي” مفتّحات، الطّبق الرّئيسي يا مع علاء يا مع حمزة يا سامي.. غشّة وتفيسيخ و ول مباشر على الثّورة.. وقبل ما ترقد ومن باب التّحلية تعاودلك الرّباعي باش تبننك!

– التّاسعة تبدالك بالمسلسل المدبلج وتمعشيق وتركحلك في اللّيل مع “طيّح القناع” أو “تعالى فشّخ الضّحك” أو “وحش المرناقيّة”.. وأنت أبقى تحرّك بينها وبين “خرّيج المرناقية”…

– نسمة: تبدا من القايلة تنسنس على أيّ خبر- خسارة خليفة وأكاهو!!- والمغرب تخرجلنا الجاير بـ”يرحم خليل” (مع العلم حكاية موت خليل وهو مزطّل في حادث وراها ما وراها.. وكيفاش أمّه شكت بأمّ صاحبه الكان معاه في الكرهبة على خاطر قالت الحمد لله على ولدي لاباس… تي مرنونة كلبة!!) وتربخ بعّد بـ”قطاطس الرّماد”..

– تونسنا، تنيّمك ببرامج هاك اليضحك على أيّ شيء (نسيت اِسمه العزّاي.. كان قبل في تونس7..!) وبعّد تركحلك “الشّادلي” وجوقة الزّبراط “خليل الرّقيق” باش تغزّل.. وقبل لا ترقد يبننوك بمقابلة في الملاكمة! وكان مازلت ما رقدش تلقى برنامج للعرّافة المغربيّة تهزّلك المورال!!

– الزّيتونة، تصبّح م الصّباح في الطّبخ والّذي منه ومن بعّد تجيبلك “الكرونيكور”  “الباجي ماتريكس” ومقابله داعية إسلامي- يا خويا ما أبسله!!- زعمة زعمة “لتوازن المشهد”!!.. وهاك الفرخ يتنطّر ويجيب في فازات باسلة!! نحّ منها “ضدّ التيّار” تلقاها نسخة في طريق النموّ باِتّجاه التّطبيع مع قناة الحوار.. وقبل لا ترقد يا مؤمن يجيبولك “الخادمي” وراه مكتبة!!

– م.تي .ف: ما نعرفش وقتاه تبدا، أما تجيب ديما في الأخير وثائقي تفرّجت عليه عشرين مرّة على قبيلة مرّة هاهي في الجبل مرّة هاهي في البحر وديما الصّوت متاع التّقرير الفرنسي أعلى من المترجم… الحاصل فيها تراش من برنامج ديني!!

– قرطاج+.. محتلّها معزّ بن غربيّة وينبّر على الحكومة، وزعمة هاوينا رجع ثوري، وجعفر القاسمي بسرواله المخطّط يدور كالطبّال! عقاب اللّيل تركح فيها زكرة بريّك في “النّوبة”

..وغيرها وغيرها..!

توّة هذا تسمّوه مشهد إعلامي؟! هذا من “بركات الثّورة” ؟! هذا إلّي تبكو على “حرّيته”؟!

شوفوا، هذا المشهد والله العظيم لا يستحقّ أكثر من بولة من بولات “عبد الله المرهّز”!!!
وإن شاء الله ما طوّلتش عليكم.. برّو توة شوفوا وين تكمّلوا مسلسل “حبّك درباني”…