أخبار عاجلة
الرئيسية / غير مصنف / الجماعة ما عادش يعرفوا وين هوما… مع اِستحقاقات الثّورة … وإلاّ مع الثّورة المضادّة

الجماعة ما عادش يعرفوا وين هوما… مع اِستحقاقات الثّورة … وإلاّ مع الثّورة المضادّة

Spread the love

الأستاذ أنور القوصري

نوّاب حافظ ولد بوه ومحسن مزروب قاطعوا اليوم الجلسة العامّة للمجلس وقالولك مانا راجعين حتّى الشّاهد يطرد هيئة الحقيقة والكرامة… وما يلزمش تعمل تقريرها وخصوصا ما يلزمش تواصل تحيل ملفّات قتلة شهداء الثّورة على القضاء الاِنتقالي.

وخونا مصطفى بن حمد رئيس كتلة الشّاهد قاللكم يلزم نعملوا قانون يلغي إحالات قتلة شهداء وجرحى الثّورة على القضاء الاِنتقالي… معناها الثّورة المضادّة بكلّ وقاحة… أمّا الّي ما ضحكنيش بلكلّ… إنّو النّهضة وحدها تبقى تدافع على إكمال مسار العدالة الاِنتقالية.

خاطر نوّاب الجبهة الشّعبية ونوّاب الكتلة الدّيمقراطية… الّي كانوا حاضرين… بلعوا موقفهم في قراجمهم… ما صدّقتش ما سمعت… كيفاش عاد؟ يدافعوا على نفس الموقف مع النّهضة؟ وقت الموقف موقفهم قبل غيرهم… من وقت بن علي.

ومانيش نحكي علي عامل فيها ثوري… وهو مشكلتو في الدّنيا كان النّهضة موش اليمين الحاكم برمّته… الجماعة عملوا فيها ما عندهمش موقف بلكلّ من المشكل المطروح… سمعت تدخّلاتهم لكلّ اليوم… بدون اِستثناء… عملوا فيها موش هنا من المشكل المطروح … ما تدخلوا كان على الشّهيد أيمن المثلوثي والفساد… والمطالبين بحقّ الشّغل… والأزمة الاِقتصادية.

وكأنّ إكمال تقرير الهيئة الّي يوثّق الاِنتهاكات ويقدّم مقترحات ما يهمهمش… وكأنّ إحالة بقيّة ملفّات الي قتلوا شهداء الثّورة على القضاء ما يعنيهمش.

وزيد نسمع واحد منهم في أخبار الوطنية يستعرف ويعلّل في موقف اللاّموقف بأنّ “النّهضة تستغلّ في هذا الملفّ”… وكأنّ شهداء الثّورة وجرحاها نهضاويين موش أولاد الشّعب. شخصيّا عرقت… الجماعة ما عادش يعرفوا وين هوما… مع اِستحقاقات الثّورة … وإلاّ مع الثّورة المضادّة.

وبعد زيدوا تساؤلوا علاش الشّعب يحطّ كلّ الطّبقة السّياسية على بعضها حاكمين ومعارضة فرد شكارة.